Dohada (Katar) geçirilen 14 ýaşa çenli oýunçylaryň arasynda 3-nji Aziýanyň ýetginjekler ýaryşynda türkmen tennisçileri hormat münberiniň ähli basgançagyny eýelediler.

Aziýa tennis federasiýasynyň (ATF) howandarlygynda geçirilen ýaryşa 20-den gowrak döwletden, şol sanda Ýewropa, Günorta Amerika ýurtlarynyň birnäçesinden we ABŞ-dan türgenler ýygnandylar.

Iň ýokary bäsleşik ýekelikde oglanlaryň arasynda bolup, onda türgenlerimiziň ikisi saýlama ýaryşdan geçmeli boldylar. Majed Albluşini (Birleşen Arap Emirlikleri) – 6:0, 6:0 we Roland Guony (ABŞ) – 6:0, 6:1 hasabynda utup, saýlama tapgyrdan geçen 12 ýaşly türkmen tennisçisi Aly Geldiýew esasy tapgyra düşdi we onda ýene bäş gezek ýeňiş gazanyp, ilkinji gezek halkara ýaryşynyň ýeňijisi boldy.

Birinji tapgyrda Aly Andreý Rakiçi (Serbiýa) – 6:1, 6:1, ikinji tapgyrda üçünji belgili Mithun Sendikumary (Hindistan) üç oýunda – 6:2, 6:7, 6:4 hasabynda ýeňdi. Çärýek finalda Salman Alýamini (Saud Arabystany) –6:2, 6:2 hasabynda ýeňlişe sezewar etdi we ýarym finalda 1-nji belgili Emirhan Rustamowdan (Türkmenistan) – 6:3, 6:4 hasabynda üstün çykdy. Ykbal oňa ýene ildeşini garşy goýdy, finalda Aly Geldiýew 4-nji belgili Süleýman Hudaýberdiýew bilen duşuşdy, Aly Geldiýew onuň bilen Türkmenistanyň ýetginjekler toparynyň düzüminde Aşgabatda geçirilen Merkezi Aziýa çempionatynda (12 ýaşa çenli) ikinji orny eýeledi. 13 ýaşly Süleýman Hudaýberdiýew Aşgabat şäherindäki 86-njy ýöriteleşdirilen orta mekdebiň 8-nji synpynda okaýar, tälimçi Gurbanberdi Gurbanberdiýewden tälim alýar.

Ildeşlerimiziň ýaryşyň baş baýragy ugrundaky aýgytly oýny dartgynly boldy. Birinji oýunda Süleýman Hudaýberdiýew – 7:6 (12:10) hasabynda ýeňiş gazandy. Ikinjisinde Aly garşydaşyndan 6:0 hasabynda üstün çykdy we hasaby deňledi. Aýgytly oýunda Aly Geldiýew güýçli oýnap, 7:5 hasabynda utdy we ýeňiji baýragyny aldy. Aşgabat şäherindäki 12-nji orta mekdebiň 14 ýaşly 9-njy synp okuwçysy, Türkmenistanyň milli ýygyndysynyň baş tälimçisi Mirali Gasanowyň ýolbaşçylygynda «Aşgabat» tennis akademiýasynda tälim alýan Emirhan Rustamow baýrakly üçünji orny eýeledi.

Katarda geçirilen ýetginjekler ýaryşynyň ýeňijisi Aly Geldiýew 7 ýaşynda Lebap welaýatynyň dolandyryş merkezinde Türkmenistanyň öňki ilkinji raketkasy, 2009-njy ýylda ýetginjekler Wimbldon ýaryşyna gatnaşan Anastasiýa Prenkonyň ilkinji tälimçisi Gözel Halmyradowany türgenleşdiren Türkmenabadyň 9-njy sport mekdebiniň tälimçisi Babamyrat Mamatrasulowyň elinde tennis oýnap başlady. Tejribeli halypanyň ýolbaşçylygynda erjel türgenleşikler kem-kemden milli derejede netije berip başlady. 2023-nji ýylda Merkezi Aziýa çempionatynda (12 ýaşa çenli) Türkmenistanyň ýetginjekler toparynyň düzüminde ilkinji kümüş medal gazandy.

Şu ýyl Aly Geldiýew Kolombo şäherinde (Şri-Lanka) geçirilen ýetginjekler Deýisiň Kubogy ugrunda ýaryşda şowly oýnap, Türkmenistanyň toparynyň düzüminde bäş ýeňiş gazanyp, ýaş olimpiýaçylaryň okuw mekdebine kabul edildi. Häzirki wagtda geljegi uly türgen Mirali Gasanowyň ýolbaşçylygynda «Aşgabat» tennis akademiýasynda ussatlygyny kämilleşdirýär.

Katarda geçirilen ýaryşda ýekelikdäki baş baýrakdan başga-da, Aly Geldiýew Ýunus Annamyradow bilen bilelikde ýeňiş gazandy. Bu üstünlige çenli olar dört gezek ýeňiş gazandylar. Birinji tapgyrda A.Geldiýew we Ýunus Annamyradow Katardan Abdullah Abdullahy we Faýsal Alfahruny – 6:0, 6:0 we çärýek finalda ikinji belgili halkara jübüti Dowud Baýkuziýewi (Özbegistan) we Mario Stefan Radukany (Rumyniýa) – 6:3, 6:4, ýarym finalda üçünji belgili Timur Ahmetowy (Gazagystan) we Mithun Sendikumary (Hindistan) – 6:2, 6:4 we finalda Daniel Karwalýo Bekeri (Braziliýa) we Andreý Rakiçi (Serbiýa) – 6:3, 6:1 hasabynda ýeňlişe sezewar etdiler.

Mary welaýatynyň 18-nji orta mekdebiň 6-njy synp okuwçysy 11 ýaşly Ýunus Annamyradow daşary ýurtlarda geçirilen ýaryşda ilkinji gezek bilelikde oýnap, ýeňiş gazandy. Ol tälimçi Andreý Döwmatowyň ýolbaşçylygynda tennis bilen meşgullanýar.

Gyzlaryň arasynda hem ýekelikde oýnamakda tutuş münberi türkmen tennis mekdebiniň wekilleri eýelediler. Birinji ýeri Aşgabat şäherindäki 42-nji ýöriteleşdirilen orta mekdebiň 14 ýaşly 9-njy synp okuwçysy Ilima Guseýnowa, ikinji orny Mary welaýatynyň 18-nji orta mekdebiň 9-njy synp okuwçysy, tälimçi Andreý Döwmatowdan tälim alýan Aýnur Annamyradowa, üçünji orny Aşgabat şäherindäki Türkmenistanyň Gahrymany Atamyrat Nyýazow adyndaky 43-nji zehinli ýaşlar mekdebiniň 8-nji synp okuwçysy Jennet Hallyýewadan tälim alýan Aýlar Kakabaýewa eýelediler.

Birinji orny eýelän Ilima Guseýnowa münbere çenli ýolda Sofiýa Çurkinany (Gazagystan) – 6:1, 6:0, çärýek finalda Ona Kildisaýteni (Litwa) – 6:1, 6:0, ýarym finalda dördünji belgili Näzli Hudaýgulyýewany – 6:2, 6:1, finalda üçünji belgili Aýnur Annamyradowany – 6:0, 6:0 hasabynda utdy. Üçünji orny eýelän ikinji belgili Aýlar Kakabaýewa üçünji orny eýelän oýunda Näzli Hudaýgulyýewany – 4:3, 4:1 hasabynda ýeňdi.

Gyzlaryň bilelikde oýnunda birinji belgili Ilima Guseýnowa we Aýlar Kakabaýewa ýeňiş gazandylar. Olar ýarym finalda Dana Halifany (Katar) we Ona Kildisaýteni (Litwa) – 6:2, 6:1 hasabynda ýeňlişe sezewar etdiler, finalda bolsa ikinji belgili ildeşleri Aýnur Annamyradowany we Sülgün Işangulyýewany – 6:2, 6:2 hasabynda ýeňdiler.

Hünärmenler Katardaky ýaryşda türkmen tennis mekdebiniň şu üstünligini teswirläp, türgenlerimiziň ýeňiş gazanmak üçin erjel oýnandyklaryny bellediler.

17 ýyl tälimçilik tejribesi bolan Babamyrat Mamatrasulow: «Çagalarymyz tennise ýürekden berlen. Olar diňe ýaryşa gatnaşmak bilen çäklenmän, ahyryna çenli göreşdiler. Olaryň ählisine hoşallyk bildirýäris! » – diýdi.

Onuň aýtmagyna görä, Türkmenistanyň Tennis federasiýasynyň ýolbaşçylary hem aýratyn gowy sözlere mynasyp, çünki türkmen tennisçileri halkara ýaryşlaryna has köp gatnaşyp, olarda üstünlik gazanýarlar.

 «AA»-nyň habarçysy

Çeşme: https://turkmenistan.gov.tm